Eerste onderhoofdogter van Hoërskool Kanonkop vertel ‘n spesiale verhaal

Daleen Naudé

Wie kan nog vir Gerda Fourie, die heel eerste onderhoofdogter van Hoërskool Kanonkop onthou? Vandag is sy Gerda Pringle, die hoof van 'n laerskool en vertel sy trots dat Hoërskool Kanonkop haar voorberei het vir die lewe. 

FOTO: Gerda Pringle (voorheen Gerda Fourie). 

Gerda se verhaal 

Die beginjare 

Gerda het in haar graad nege jaar by Hoërskool Kanonkop aangesluit toe die skool amptelik in 1991 begin het. Sy was in graad agt in Hoërskool Middelburg. 

"Ons moes nog in ons Middies klere skoolgaan vir 'n hele ruk voordat ons, ons eie skoolklere gekry het. Dit was maar 'n kleurvolle spulletjie, die graad agts van daardie jaar moes in hul laerskool se klere skool toe kom - 'n lekker bont spul." Gerda was in Laerskool Tuinplaas in Limpopo. 

Hulle het einde van haar graad sewe jaar verhuis nadat haar pa, Tiaan, ‘n oorplasing na Mpumalanga gekry het. Alles was nuut en daar was nog gedeeltes van die skool wat in aanbou was. Gerda en haar broers het destyds gehelp om die plaveisel te lê vir die aantreeblad. "Ek moes gaan help, al was ek ‘n dogter, want dit was my skool, en my broers was maar nog klein en moes saam, want hulle moes help met hul toekomstige skool."

Dit was dieselfde met die gras plant op die A-rugbyveld. "Ek moes gaan help, my pa het nie gesê ek moet by die huis bly omdat ek nie rugby speel nie. Dit is my skool, ek moet werk! Ons kon nie eintlik groot skenkings aan die skool bekostig nie, maar het altyd ons tyd gegee om te gaan help met enige werk wat nodig was, so op ons baie stil manier."

 Eerste matriekgroep

Gerda was dus deel van die heel eerste matriekgroep in die skool se geskiedenis. "Vir my was dit regtig ‘n voorreg. Ek het van ‘n bitter klein laerskool af gekom, ons was maar in totaal 12 graad sewes (ses seuns en ses dogters). Die baie groot skool in graad agt was effe oorweldigend, maar om saam met Kanonkop te kon groei na ‘n groot skool toe, was net ‘n voorreg."

Verkiesing as onderhoofdogter 'n verrassing

Gerda sê sy het glad nie verwag dat sy as onderhoofdogter verkies sou word nie. "Ek het regtig gedink iemand anders gaan dit kry, omdat ek nie daar op skool was en basies in die dorp grootgeword het nie. Ek was ook nie in my oë ‘n kultuurreus of enigsins talentvol in sport nie. Ek het maar net gesorg dat ek altyd my kant bring orals waar die skool my nodig gehad het."

Wou graag leierbaadjies hê 

"Ons groep wou so graag ‘n kleurbaadjie gehad het – die skool het nog nie gehad toe ons as leiers aangewys is nie. As ek dit nie mis het nie, was dit ons prefekgroep wat met mnr. Ben de Klerk (destyds onderhoof) gesels en mooi gevra het vir ‘n grys baadjie. Die volgende jaar se leiers was gelukkiger as ons, hul baadjies was betyds."

FOTO: Die eerste leiers van Hoërskool Kanonkop saam met me. Salomé van Vuuren, mnr. Koos Kruger (destydse hoof) en mnr. Ben de Klerk. Gerda staan vierde van regs agter.

Spesiale herinneringe 

Sy onthou baie spesiale oomblikke by Kanonkop. "Die een wat nogal vir my mooi was, was ons matriekafskeid. Dink dit is een van die min wat in die skoolsaal gehou is. "Ek het met matriekafskeide grootgeword toe ek in die laerskool was met my ma wat by 'n hoërskool gewerk het. Hulle het ook matriekafskeid op die skoolterrein gehou, so vir my was dit nogal spesiaal."

Onderwysers wat impak op lewe gehad het

"Daar is baie wat ek kan onthou, as mens ouer word onthou jy moes van nature net die mooi. Dié wat ek werklik baie goed en met deernis onthou is mnre. Hans Kruger, Ben de Klerk, me. Carin Grace, me. Carin Wiid, me. Salomé van Vuuren, me. Claasen en me. Linnenkamp."

 Self ook in onderwysloopbaan 

"Ek wou nooit onderwys swot nie, maar die Here het vir my ander planne gehad en vandag is ek nie een oomblik spyt nie." Sy het haar onderwyskwalifikasies aan die Randse Afrikaanse Universiteit (RAU) behaal. Sy is hoof by Laerskool Eenheid in Modimolle (Nylstroom). Sy sê die naam is nog Afrikaans, maar die skool is nou ‘n Engels medium skool. Die ander laerskool in die dorp, Laerskool Nylstroom, is die Afrikaanse laerskool in die dorp.

KHS se invloed op haar lewe 

"Dit is lekker om terug te dink en te besef dat jy deel gehad het aan ‘n groot klompie geskiedenis. Dit laat jou dinge aanpak wat hopelik ‘n verskil in ander se lewe ook kan maak – soos wat die skool in ons lewens gemaak het. "Jy hoef nie altyd jou drome op ander te bou nie, soms is jy die droom in iemand anders se oë. Dit is seker hoekom ek nog altyd voel dat elkeen van ons ‘n baie groter invloed op ander se lewens het as wat ons soms wil erken of voor verantwoordelikheid vat."

Steeds kontak met mekaar 

Die 1994-matrieks het die laaste paar jaar weer kontak met mekaar gemaak en is deel van 'n WhatsApp-groep. "Hulle is almal lekker mense – dié wat aangetrou en bygekom het ook!"

FOTO: Die 1994 matrieks tydens ‘n onlangse kuiertjie. Gerda onthou die groep wat saam met haar in die skool was se name, maar nie al hul eggenote nie. Voor sit Christelle Raubenheimer, Carin Esmondwhite, en Carin se man. Middel: Debbie Schoombee, Nelia Visagie, Gerrit se vrou en Christelle se man. Agter: Gerda, Gerrit Gerritsen, James de Wet en sy vrou, Surina, en Johan Pieterse.
 

Baie dinge het verander 

Sy vertel laggend dat die manne se sitvlakke daardie tye nog gebrand het as hulle kwajongstreke uitgehaal het. "Vandag is dit natuurlik heeltemal ongehoord, so ons onderwysers moet baie meer kreatief werk om ‘n kind goeie maniere en gedrag te leer!"

Boodskap aan KHS se huidige leerlinge

"Vyf-en-dertig jaar gelede het ons die voorreg gehad om die eerste matriekgroep van Hoërskool Kanonkop te wees. Ons het in ‘n jong skool ingestap sonder jare se tradisies of geskiedenis – ons moes saam help bou aan die fondasie waarop julle vandag staan. Vandag dra julle daardie nalatenskap verder. Today, you carry that legacy forward. Do not simply pass through your school years – leave something of yourself behind. Work hard, be proud of your school. Respect your teachers. Stand up for what is right. Make memories, build friendships, and live each day with character and integrity. "Eendag gaan julle ook terugkyk en besef dat dit nie net oor punte, sport of prestasies gegaan het nie – It is about who you became. Julle dra die toekoms van Kanonkop verder. Dra dit met trots.’

Eerste hoofstukke en nuwe stories 

"Ons het 35 jaar gelede gehelp om die eerste hoofstukke van Hoërskool Kanonkop se verhaal te skryf. Vandag sien ons met trots hoe die volgende geslag die stories verder skryf - from the first matric class to the next generation."

Om 'n hoërskool vir jou kind te kies 

"‘n Hoërskool kies jy nie net vir vier of vyf jaar nie – jy kies dit vir die mens wat jou kind gaan word. "Hoërskool Kanonkop is more than academics, sport and culture. It is a place where young people are shaped; where values matter; where discipline, perseverance, character and pride is built. "Vir 35 jaar bou Kanonkop nie net aan uitslae nie, die skool bou aan mense. Elke kind verdien ‘n plek waar hulle gesien word, uitgedaag word, ondersteun word en geleer word om hul volle potensiaal te bereik. "Kanonkop did not only prepare me for matric, the school prepared me for life."

Gerda se gesin 

Sy is in 2007 met James Pringle getroud. Hy is ongelukkig in 2017 oorlede. Hulle het tot met sy afsterwe op 'n plaas gewoon, waar hy geboer het "Ek het lekker herinneringe van sportdae en deelname by Kanonkop gehad, wat James nooit beleef het nie. Ek het altyd baie lekker stories gehad om te vertel wat hom soms lekker groen van jaloesie gehad het, maar wat gemaak het dat hy gestreef het daarna dat sy kinders dieselfde skoolervaring gehad het as wat ek beleef het " Gerda het twee dogters, Chloe (18) en Amy (15).

FOTO: Die Pringle gesin sowat ‘n jaar voor James se afsterwe.

FOTO: Gerda se dogters, Amy en Chloe